БИШКЕК, 31-мар. — Sputnik. Белгилүү баскетболчу Майкл Жорданды Forbes журналы карьерасын аяктаса да эң көп акча тапкан спортчулардын көч башында турарын жазды. Бул жыйынтык 2015-жылдын көрсөткүчтөрүнө таянуу менен чыгарылган.
Экинчи орунду футболчу Дэвид Бекхэм алганын журналдын расмий сайтында маалымдалат.
2003-жылы карьерасын аяктаган Жордан буга чейин да эң көп акча тапкан спортчулардын көч башында келген. "Чикаго Буллздун" атактуу оюнчусу, учурда НБАнын "Шарлотт Хорнетс" клубунун ээси жана ишкер Майкл Жордан былтыр 110 миллион доллар иштеп тапкан. Бул киреше "Манчестер Юнайтед" клубунун мурдагы оюнчусу Дэвид Бекхэмдин тапкан акчасына салыштырганда 45 миллионго көп.
Басылма белгилегендей, Жордан жыл өткөн сайын өзүнүн популярдуулугун сактап келет. Журнал ошондой эле 2016-жылы да ал карьерасын аяктаган башка спортчуларга караганда 30 миллион доллар көп иштеп табат деп болжолдоп жатат.
Белгилей кетсек, Forbes журналынын алдыңкы ондугунда Жордандын мурдагы атаандаштары Шакил О'Нил (22 миллион, 7-орун) жана Межик Жонсон (18 миллион, 10-орун) да бар.
