БИШКЕК, 18-сен. — Sputnik. Шанхай кызматташтык уюмуна мүчө өлкөлөрдүн "Тынчтык миссиясы — 2021" аталышындагы терроризмге каршы командалык машыгуусу өтүп жатат. Бул тууралуу өлкөнүн Коргоо министрлиги билдирди.
Машыгуулар Россиянын Оренбург облусундагы Донгуз полигонунда 11-25-сентябрь күндөрү болору айтылды. Ага ШКУга мүчө мамлекеттер — Россия, Индия, Казакстан, Кыргызстан, Кытай, Пакистан, Тажикстан жана Өзбекстандын 4 миңге чукул аскери катышууда. Кыргызстан Куралдуу күчтөрүнөн "Скорпион" атайын багыттагы бөлүгүнүн 100дөн ашуун аскери барган.
"Машыгууга Ми-8 тик учагы, СУ-24МР чалгындоочу самолёту, СУ-34 истребители жана Ил-76 аскердик-транспорттук учагы тартылган. Мында аскерлер ШКУга мүчө мамлекеттердин коалициялык тобунун күчтөрү менен биргеликте террорчуларга каршы операцияларды жүргүзүүнү өздөштүрөт", — деп айтылат маалыматта.
Мындай машыгууларды өткөрүүнүн максаты аскердик башкармалык органдарынын шайкештик деңгээлин жогорулатуу жана эл аралык террордук уюмдардын согуштук аракеттерине каршы аскердик күчтөрдү калыптандыруу болуп саналат.
