Дубайда дүйнөдөгү эң узун алтын чынжыр даярдалды

БИШКЕК, 7-янв — Sputnik. Узундугу беш жарым чакырымдан ашкан жана баасы дээрлик 6 миллион долларды түзгөн алтын чынжыр Дубайда (БАЭ) даярдалды деп билдирет РИА Новости Эмираттардын The National гезитине таянуу менен.

Чынжыр алтындан жасалган эң узун зергер буюму катары Гинесстин рекорддор китебине кирет деп божомолдонууда. 

Алтын чынжырды жүз адам 45 күндө даярдады. Ар биринин салмагы 22 карат болгон 4 миллион илмектен турган жасалганын узундугу 5,52 чакырым, салмагы 256 килограмм. Азем жасалганы жаратуу Дубайдагы жыйырманчы Соода фестивалына арналды. Фестивалдын жүрүшүндө дүкөндөр менен соода борборлору кардарларга 70 пайыздык арзандатууларды сунуштап, ар кандай байгелер ойнотулат. 

Бардык каалоочулар зергер чеберчилигинин ажайып кереметин Дубайдын эски бөлүгүндөгү алтын базарынан көрө алышат. Бул туристтер арасында атагы чыккан жер. Дүйнөлүк рекорд катталгандан кийин чынжыр бөлүп-бөлүп сатылат. 

"Ар бир билерикке же чынжырга Гинесстин рекорддор китебине кирген буюмдун бир бөлүгү экендигин тастыктоочу кайталангыс код берилет", — деп белгилейт гезит. 

1999-жылы да Дубайда соода фестивалы учурунда алтын чынжыр даярдалган. Анда жасалганын узундугу 4,28 чакырымга жеткен.