БИШКЕК, 10-янв — Sputnik. Пекиндин соту жума күнү атактуу актёр жана режиссёр Жеки Чандын уулуна карата жарым жыл түрмөгө камоо жөнүндө өкүм чыгарды деп билдирет РИА Новости "Франс Пресс" агенттигине таянуу менен.
Өткөн жылдын декабрь айында Голливуд жылдызынын уулуна Кытайдын көзөмөл органы тарабынан баңги зат сакталчу жайды кармаган деп айып коюлган. Жарым саатка созулган сот отуруму анын жакынкы аралыктагы тагдырын чечти.
"Ал алты айга кесилет, ал бул жазаны түрмөдө өтөйт. Ошондой эле ага 2 миң юань (320 доллар) айып салынды", — деп айтылат Пекин сотунун өкүмүндө.
Комедиялык согуш тасмаларынын каарманы Жеки Чандын уулу сентябрь айында өзүнүн досу 23 жашар тайвандык киноактёр Кэ Чжэньдун менен бирге Кытайдын борбор шаарында кармалган. Кармалгандардын экөө тең баңги затты колдонгондугун текшерүүгө тесттен өткөн. Достор баңги затты пайдалангандыктары ырасталган соң, полиция Жейсинин үйүндө тинтүү жүргүзүп, 100 грамм анаша тапкан.
Китайдын жол башчысы Си Цзиньпин мамлекет тиги же бул жагынан баңги зат менен байланышы бар жарандардын бардык аракеттерине чечкиндүү жана катуу бөгөт коёт деп билдирген июнь айында. Өз кезегинде 2009-жылы Жеки Чан Кытайдын баңги заттарга каршы улуттук комитетинин төрагалыгына дайындалган жана анын милдетине өлкөдө баңгиликке каршы билимди пропагандалоо кирген. Актёр өз уулунун жүрүм-туруму үчүн ачык кечирим сурап, анын жасагандары үчүн жоопкерчиликти өзүнө аларын билдирген.
Баңги затка байланышкан укук бузуулар Кытай Эл Республикасында катуу жазаланат жана бир катар учурларда өлүм жазасы колдонулат.
