БИШКЕК, 22-янв — Sputnik. 2014-жылы республика боюнча 2 миллиард 115 миллион сомдук 1 миллион 777 миң тонна көмүр казылып алынган. Бул былтыркы жылга салыштырмалуу 125%ды түзөт. Бул тууралуу "Кыргызкөмүр" мамлекеттик ишканасынын башкы директору Мирлан Жакыпов маалымат жыйында билдирди.
Ал ошондой эле, казылган көмүр чет жакка да сатыла турганын белгилеп, Кытай, Өзбекстан жана Тажикстанга 150 миллион сомдук 120 миң тонна көмүр экспорттолгонун кошумчалады.
Мирлан Жакыпов 2014-2015-жылытуу сезону маалында Бишкек жылуулук борборуна "Кыргызкөмүр" ишканасы 550 миң тонна көмүр алып келүүгө милдеттендирилгенин айтты.
"Кыргызстандагы көмүр казуучу ишканалар тарабынан Бишкектеги жылуулук борборуна 550 миң тонна көмүр алынып келинет. Анын ичинен 350 миң тоннасын Кара-Кече Кабак бассейнинен келе турган болсо, 50 миң тоннасы Таш-Көмүрдөн ташылышы керек. Эки бассейнден жалпысынан 400 миң тонна көмүр келиши керек болсо, учурда анын 60 миң эле тоннасы калды", — деди ал.
Калган алтымыш миң тонна февраль айына карата ташылып бүтөрүн, дагы 150 миң тоннаны март айынын аягына чейин алып келүү боюнча жаңы келишим түзүлө турганын Мирлан Жакыпов баса белгиледи.
