БИШКЕК, 2-фев — Sputnik. Бишкек шаарында мамлекеттик жана аскерий ишмер Михаил Фрунзенин 130 жылдыгы белгиленди. Ал 1885-жылы 2-февралда Пишпек шаарында төрөлгөн.
Кыргызстандын борбору 65 жыл бою Фрунзенин атын алып жүргөн.
Анын туулган күнүнүн урматына Эркиндик гүлбагындагы эстелигине гүлчамбар коюлду. Бул салтанатка мамлекеттик ишмерлер, окуучулар жана Суворов лицейинин курсанттары катышты.
Салтанатка катышкан Россиянын Кыргызстандагы элчисинин жардамчысы Алексей Мзареулов Михаил Фрунзе аскер кол башчы катары абдан таланттуу болгонун, чечкиндүү кадамдары менен аркасынан аскерлерди ээрчитип кетүү жөндөмдүүлүгүн белгиледи.
Майрамдык иш-чара Михаил Васильевич Фрунзе атындагы үй-музейде улантылды. Музейдин чоң залында Михаил Фрунзенин элеси түшүрүлгөн сүрөттөрдүн, скульптуралардын көргөзмөсү болду.
Үй-музейдин жетекчиси Бакыт Бакчиевдин айтымында, көргөзмөгө коюлган сүрөттөр буга чейин музейдин сактоо жайында болчу. Көргөзмө бир айга чейин улантылат.
Михаил Фрунзе атындагы музей 1925-жылы ачылган жана аскерий ишмердин өмүрүнө жана ишмердигине арналып ачылган алгачкы музей болуп саналат.
