БИШКЕК, 17-фев — Sputnik. Жалал-Абад облусунун Майлуу-Суу шаардык ветеринардык кызматынын жана санитардык-эпидемиялогиялык станциясынын кызматкерлери тарабынан 481 баш кой-эчки, 357 уй, эки жылкы, төрт эшек, үч ит күйдүргү дартына каршы эмделг. Бул туурасында Өзгөчө кырдаалдар министрлигинин маалымат кызматы билдирди.
Жалал-Абад облусунун Майлуу-Суу шаарындагы Көк-Таш айыл аймагында 5-февраль күнү Майлуу-Суу шаардык ооруканасына 7 адам күйдүргү оорусуна шектелип жаткырылган. Учурда алардын абалы жакшы, дарыгерлердин көзөмөлүндө.
Такталган маалыматтарга ылайык, 2015-жылдын 24-январында Көк-Таш айылынын Южная көчөсүнүн №46 үйүнүн тургуну Сайбидин Мурзалиевдин малын кошуналары союшуп, 36 кожолукка таркатышкан. Союлган малдын этинен күйдүргү дартын аныктоо максатында Ноокен райондук ветеринардык лабораториясына жөнөтүлгөн. Анын жыйынтыгы 11-февралда чыгып, малдын этинен күйдүргү дартынын козгогучу табылган.
