Бишкек, 23-фев. – Sputnik. Кара-Суу шаардык "Аc-Сарахсий" атындагы борбордук мечитинде Ош облусунун казысы Ниязали ажы Арипов, Кара-Суу районунун ички иштер башкармалыгынын башчысы Башкур Абдукалыков жана Дин иштери боюнча мамлекеттик комиссиянын өкүлү Канат Абдураимовдор жергиликтүү жамаат менен жолугушту. Бул туурасында Ош облусунун мусулмандар казыятынын маалымат бөлүмүнөн маалымдашты.
Жолугушууда облус Казысы жамаатка жума баянын жасады.
"Ислам динин жайылтууда Ханафий мазхабы жана Матрудия акыйдасы эң туура жолду көрсөтөт. Андыктан, бул маселеге байланыштуу жергиликтүү жамааттын намаз окуу тартиптеринде да Ханафий мазхабына эрегишип ибаадат кылуусуна чакырабыз. Ал эми кээ бир жарандардын ислам динин туура түшүнбөй туруп, Сириядагы окуяларга байланыштуу жихад терминин өз алдынча ар кандай чечмелөөгө баруусу наадандыкка жатат", — деди облус казысы Ниязали ажы Арипов.
Ал элди ар түрдүү багыттарга азгырылбай, динди бурмалабай бири-бирине туура жеткирүүгө үндөдү.
Жолугушууда элге менен түшүндүрүү иштерин жүргүзүүгө келгендер жамаат менен бирге жума намазын окуп, жергиликтүү тургундарга жана мечиттин жаңы дайындалган имам-хатиби Сүйүн ажы Калыковдун ишине ийгилик каалашты.
Аталган мечитке мындан бир нече күн мурда Сүйүн ажы Калыков имам болуп дайындалган. Анын буга чейинки имамы Рошад Камалов эл арасында диний-экстремисттик уюмдун идеясын жайылтып жана Сирияга кетүүгө үндөп жүргөн деген шек менен ИИМдин 10-бөлүмү тарабынан кармалып, эки айга убактылуу кармоочу жайга отургузулган.
