БИШКЕК, 6-мар. — Sputnik. Улуу Жеңиштин 70 жылдыгына карата "Жеңиштин ысымдары" аттуу акция активист-изилдөөчү Каныбек Мырзакановдун үй-бүлөсү жана Россия, Казакстан, Украина, Белоруссия жана башка мамлекеттердеги кыргыз диаспораларынын демилгеси менен башталды. Бул иш-чаранын максаты 1941-1945-жылдардагы согуш маалында дайынсыз жоголгон кыргызстандык жоокерлердин көмүлгөн жерин аныктап, аларды издөө экенин "Замандаш" ассоциациясы билдирди.
Маалыматтарга ылайык, кыргызстандык жоокерлердин көпчүлүгү Россиянын, Белоруссиянын, Украинанын, Польшанын, Венгриянын, Румыниянын, Австриянын, Германиянын согуш талааларында 5 миңден ашык кыргызстандык да каза болуп, дайынсыз жоголгон. Бүгүнкү күнү согушка кеткен жоокердин жакындары чоң ата, таяталарынын кайда көмүлгөнүн, кантип каза болгонун билишпейт.
Бул акциянын алкагында Россиядагы, Казакстандагы, Украинадагы, Белоруссиядагы жана башка мамлекеттердеги кыргыз диаспораларынын өкүлдөрү издөө иштерине жардам берет. Акция 2015-жылдын 9-майына чейин улантылат.
Экинчи дүйнөлүк согушта советтер союзунан 27 миллион киши каза болгон. Улуу Ата Мекендик согуштун фронтторунда 360 миңден ашык кыргызстандык жоокерлер кызмат өтөп, фашисттик Германияга каршы согушкан.
Согушта көрсөткөн эрдиги үчүн 73 кыргызстандык эң жогорку Алтын Жылдыз сыйлыгына татып, Советтер союзунун баатыр наамын алган. 21 жоокер Эрдик орденинин кавалери болуп, миңден ашык кыргызстандык түрдүү орден, медалдар менен сыйланган.
