БИШКЕК, 19-мар. — Sputnik. Коомдук телерадиоберүү корпорациясынын жетекчисин тандоо бүгүн саат 14-00дө башталаарын каналдын байкоочу кеңешинин мүчөсү Игорь Шестаков билдирди.
Ал ошондой эле, "Элдик кыймыл: Люстрация" коомдук бирикмеси каналдын коомдук байкоочу кеңешинин төрагасы Абды Сатаровдун атына КТРКнын жетекчисин шайлоону түз эфирден көрсөтүүнү уюштуруу талабы менен кайрылышканын кошумчалады.
Аталган кыймылдын кайрылуусунда, Илим Карыпбековдун талапкерлиги таңууланып жатканы жана анын журналисттик тажрыйбасы жоктугу коомду тынчсыздандырат деп жазылат.
"Карыпбеков жакшы юрист, бирок, анын конкурстун шарттары талап кылган 5 жылдык журналисттик жок тажрыйбасы жок", — деп белгилешет алар.
Коомдук телерадиокорпорациянын мурдагы жетекчиси Султан Жумагулов өзүнүн каалоосу менен отставкага кеткен. Анын арызын байкоочу кеңеш бир добуштан кабыл алып, ордуна милдетин аткарып турганга Илим Карыпбековду шайлашкан.
