БИШКЕК, 20-мар. — Sputnik. Өспүрүм кызды тоногон деп шектелип жаткан жаранды милиция издеп жатканын Бишкек ИИББдин маалымат кызматы билдирди.
Буга чейин социалдык тармактын колдонуучулары Бишкектеги Ботаникалык бактан белгисиз киши 12 жаштагы кызды зордуктоого аракет кылганын жазышкан. Бактыга жараша өспүрүмгө ал жакта ити менен сейилдеп жүргөн кинолог жардам берген.
"Тигил киши качып кетти, ал каалаган нерсесин жасоого жетишпей калды", — деп жазат социалдык тармактын бир колдонуучусу.
Октябрь РИИБден билдиришкендей, аларга арыз менен аял кайрылып, 20-25 жаштардагы европа улутундагы киши анын кызынын буюмдарын – уюлдук телефон жана алтын жалатылган сөйкөсүн тартып алганын айткан.
"Ал жакта кинологдор дайыма сейилдешет. Алар жардам сурап кыйкырган үндү укканда, ал тарапка барышкан. Итти көргөн адам коркуп качып кеткен", — деп билдирди ИИББ.
Учурда шектүү адамды издөө улантылууда. Кылмыш жаза кодексинин 167-беренеси (Тоноо) боюнча кылмыш иши козголду.
