БИШКЕК, 2-апр. — Sputnik. Улуттук коопсуздук боюнча мамлекеттик комитетинин Ош шаардык жана Ош облустук башкы башкармалыгы аталган аймактан Сириядагы согуштук аракеттерге катышып кайткан үч адамды кармады. Бул туурасында УКМКнын маалымат кызматы билдирди.
Кармалган 26-27 жаштагы үч жаран Сириядагы согуштук аракеттерге катышып, терроризм боюнча даярдыктан өткөн. Буларга карата УКМК Кылмыш Жаза Кодексинин 375-беренеси (Жалданмачылык) боюнча кылмыш ишин козгоду.
"Эл аралык террордук уюмдун кармалган мүчөлөрү чыр-чатак болгон аймактан – Сириядан жакынкы айларда кайтып келишкен", — деп билдирди УКМКнын маалымат кызматынын жетекчиси Рахат Сулайманов.
УКМКнын Ош облустук жана Ош шаардык башкармалыгы 2014-жыл ичинде Сириядан кайтып келип, Кыргызстанда ар кандай теракттарды уюштурууну пландаган үч топту кармаган.
Акыркы маалыматтарда Сирияга жихад деген ишеним менен кеткендердин саны 230дун тегерегинде, аларын ичинен 126 адам Ош аймагынан.
