БИШКЕК, 10-апр. — Sputnik. Ысык-Ата районундагы Нурмамбет айылынын тургундары желим баштыктарга оролуп биотермикалык аңга ташталган жүздөй эшектин этин башка жакка алып кетүүнү талап кылып жатканын Sputnik сайтынын кабарчысы окуя болгон жерден билдирди.
Чүй облусунун Ысык-Ата районундагы Нурмамбет айылынын тургундары айылдын четинен желим баштыктарга оролгон жүздөй эшектин этин бейшемби күнү табышкан.
Айыл тургундарынын айтымында, жергиликтүү бийлик элдин "этти башка жакка алып кеткиле" деген талабын аткарбастан, жума күнү эртең менен этти өртөшкөн. Бирок эт толук күйүп бүткөн эмес.
Окуя болгон жерге 50дөй жергиликтүү тургун чогулду.
"Эгер бийлик эттерди алып кетпесе, анда өзүбүз аларды Бишкек менен Кант шаарына жана башка аймактарга алып барып таштайбыз", — дейт ачууланган айыл тургундары.
Эл чогулган жерге келген жергиликтүү бийликтин өкүлдөрү комментарий берүүдөн баш тартууда. Эт ыргытылган жерге "Камаз" үлгүсүндөгү жүк ташуучу машина келди.
Буга чейин Ветеринария инспекциясы табылган 101 эшектин эти жок кылынганын билдирген болчу.
Быйыл февраль айынын аягында Сокулук районунун Ак-Жол айылындагы сарайлардын биринде эшек союлуп жатканы аныкталып, калк арасында бир топ чуу болгон. Эшектерди сойгон "Кайтал" ЖЧКсы бул эттер Гонконгдогу зоопарктарга жеткирилерин айтып ишендирген.
