БИШКЕК, 16-апр — Sputnik. Ош, Жалал-Абад шаарларын калыбына келтирүү дирекциясынын ишин иликтөө боюнча 4 кылмыш иши козголуп, анын ичинен үчөөсү токтотулуп, бирөөсү жабылган. Ал эми прокуратурага бул жаатта тапшырылган иш июнда аягына чыгат. Бул туурасында баш прокурор Индира Жолдубаева парламентте билдирди.
Эсеп палатасынын текшерген жыйынтыгынан кийин, Башкы прокуратурага бул ишти иликтеп, юридикалык баа берүү боюнча тапшырма берилген.
"Эсеп палатасынын документтери бизге (башкы прокуратура – ред.) мартта келип түшүп, ЖКнын токтому менен бул маселеге июнь айына чейин баа берүү Башкы прокуратурага тапшырылган. Азыр бул боюнча төрт кылмыш иши козголуп, анын ичинен 3өөсү токтотулуп, бирөөсү жабылган", — деди Жолдубаева.
Бул үч иш кызмат абалын кыянаттык менен пайдалануу фактысы боюнча башкы жетекчилерге карата козголгон. Үч иште тең мамлекетке материалдык жактан чыгым келтирилгендиги каралган. Төртүнчү иш боюнча мамлекетке чыгым келбегендиктен, анын курамында кылмыштын белгилери жок деген негизде иш жабылган.
"Ал эми Эсеп палатасынын бизге берген текшерүү жыйынтыгы боюнча ишти өзүнүн мөөнөтүндө бүткөрүп, сиздерге маалымат беребиз", — деди Жолдубаева.
2010-жылы түзүлгөн Ош, Жалал-Абад шаарларын калыбына келтирүү дирекциясын экс-премьер-министр Жантөрө Сатыбалдиев башкарган. Бул боюнча коомчулук жана ЖК депутаттары тарабынан анын дарегине каражатты максатсыз пайдаланган деген көп сын-пикирлер айтылып келет.
