БИШКЕК, 12-май — Sputnik. Сариев лицензиясы жок иштеген акча алмаштыруу жайларын текшерүү механизмдерин иштеп чыгууну тапшырып, Улуттук банкка Экономикалык кылмыштуулукка каршы күрөшүү мамлекеттик кызматы менен тыгыз иштөөгө тапшырма берди. Бул туурасында өкмөттүн маалымат кызматы билдирди.
Дүйшөмбү күнү Темир Сариев Улуттук банктын төрагасы Толкунбек Абдыгуловду кабыл алып, өлкөдөгү банк секторунун өнүгүшүн жана валюта рыногундагы абалды талкуулады. Сариев валюта рыногундагы чайкоочулукка жол бербөө үчүн Улуттук банктын акча алмаштыруучу жайлар менен коммерциялык банктарды тыкыр көзөмөлдөө зарылдыгын айтты.
Апрель айынын ортосунда АКШ долларынын курсу дароо төмөндөп, валюта рыногунда олку-солку толкунду пайда кылган. Айрым эксперттер мындай көрүнүш убактылуу нерсе экенин айтышса, айрымдары чайкоочулук менен алектенген акча алмаштыруу жайларынын аракеттери деп билдиришкен.
