БИШКЕК, 14-май — Sputnik. Координациялык кеңеш Бишкек мэриясы тарабынан сунушталган шаарды жарыктандыруу тармактарын жаңылоо программасын жактырды деп билдирди өкмөттүн маалымат кызматы.
Кеңешмеде Бишкекте жарыктандыруу тармактарын жаңылоо программасы, Дүйнөлүк Банк тарабынан "Бишкекжылуулук тармактары" ишканасы боюнча долбоорго кредиттик каражаттарды бөлүү маселеси талкууланды.
"Жыйынтыгында, муниципалитеттин шаарды жарыктандыруу боюнча демилге колдоого алынды. Кеңеш мамлекеттик органдарга борбордун жылуулук тармагын жаңылоо долбооруна алына турган каражаттардын шарттарын карап чыгууну тапшырды", — деп айтылат маалыматта.
Кеңешмеде Кыргызстандын 2016-2018-жылдарга каралган бюджеттин орто мөөнөттөгү алдын ала божомолдоолору талкууланып, жактырылды.
