БИШКЕК, 16-июнь — Sputnik. Казакстандын Алматы облусундагы Или районунун Акчий аймагынан кулчулук кылып жүргөн Кыргызстандын тогуз жараны аныкталды. Бул туурасында ТИМдин маалымат кызматы билдирет.
Мекендештерди Кыргызстандын Алматы шаарындагы Башкы консулдуктун кызматкерлери тапкан.
Алар тараткан маалыматта бул адамдар Чүй облусу менен Бишкек шаарынан мыйзамсыз чыгарылып, Чу дарыясы аркылуу Казакстанга алынып кеткен.
"Казакстандын тартип коргоо органдарынын кызматкерлери тогуз жаран Чүй облусу менен Бишкек шаарынан мыйзамсыз чыгарылып, Чу дарыясы аркылуу Казакстанга киргизилип кеткенин аныктады. Жаңы жайга баргандан кийин кыргыз жарандары зордоп ишке салынган. Адам чыдагыс шартта жашап, кылган ишине бир тыйын акы алган эмес. Ичкен тамагы начар болгондуктан, жана медициналык кароонун жоктугунан ден соолуктары начарлап кеткен", — деп айтылат билдирүүдө.
Эл сейрек кездешкен бул таалаанын ээлери ишке алып бара жаткандардын документтерин Кыргызстандан эле алып коюшкан жана, эгерде качканга аракет кылса, катуу жаза ала турганын айтып коркуткан.
"Аталган жерде баш-аягы 17ге жакын киши талаада иштегендиги, алардын ичинен экөөсү аял экендиги аныкталган. Дипломатиялык миссиянын кызматкерлери баргычакты талаа ээлери калган жумушчуларды камыштардын арасына жана арыкка катканга үлгүрүшкөн", — деп билдирди ТИМдин маалымат кызматы.
Табылган кыргызстандыктар Алматы шаарындагы реабилитациялык борборго убактылуу жайгаштырылып, аларга укуктук жана психологиялык жактан тиешелүү көмөк көрсөтүлүүдө.
