БИШКЕК, 19-июнь — Sputnik. Бостондогу теракт үчүн өлүм жазасын алган Жохар Царнаевдин дагы бир досу тергөө учурунда маалымат жашырганы үчүн 2,5 жылга эркинен ажыратылганын Бостон сотуна таянуу менен РИА Новости агенттиги билдирет.
Айыптоочу тараптын версиясы боюнча, Хайрулложан Матанов ага-ини Царнаевдер менен теракт алдында бирге тамактанган. Бирок ал бул маалыматты тергөөчүлөргө айткан эмес. Мындан тышкары, Царнаевдер менен тааныштыгы бар экенин далилдеген материалдардын баарын өздүк компьютеринен өчүрүп салган. АКШга Кыргызстандан барган Матанов күнөөсүн мойнуна алып, тергөө менен кызматташууну чечкен.
Бейшемби күнү сот процесси учурунда Матанов тергөөчүлөргө калп айтканы үчүн кечирим сурады. Сотту алып барып жаткан судья Уильям Янг айыпталуучу Матанов теракт тууралуу кабары болбогонун билдирди.
"Сен даярдалып жаткан бомбалар тууралуу билбегениң чын, бирок бизге сенин жардамың керек эле", — деген Янгдын сөздөрүн CBS каналы келтирет.
Буга чейин Царнаевдин эки казакстандык жана бир америкалык досу соттун чечими менен үч жылдан алты жылга чейин эркинен ажыратылган.
