БИШКЕК, 26-июнь — Sputnik. Кыргызча-орусча сөздүктүн түзүүчүсү Константин Юдахиндин 125 жана сөздүктүн 50 жылдыгынын урматына академиктин эстелигине гүл коюлуп, Токтогул Сатылганов атындагы улуттук филармонияда эскерүү аземинин расмий бөлүгү өттү.
Буга чейин каралбай калган эстелик оңдолуп, айланасы иретке келтирилген. Гүл коюуга министрлер, чиновниктер жана шаардык ЖОЖнын жетекчилери катышты.
Тил комиссиясынын которуу бөлүмүнүн жетекчиси Аалы Молдокматов сөздүктөр Юдахиндин кезинде чыгарылгандай басылып чыкканын белгиледи.
"Учурда аталган сөздүктөрдүн электрондук версиясы даярдалды. Кеңири жайылтуу боюнча аракеттер көрүлөт. Каражаттын жетишсиздигинен быйыл болгону сөздүктөр эки миң нускада гана чыкты. Эмдиги жылы нусканын санын көбөйтөбүз деген ишеним бар", — деди ал.
Аталган мааракелерге арналган илимий-практикалык конференциялар сентябрь-октябрь айларына пландаштырылган.
Константин Юдахиндин эмгеги 1967-жылы жогору бааланып, сөздүк СССРдин мамлекеттик сыйлыгына татыган.
