БИШКЕК, 29-июнь — Sputnik. Мугалимдердин айлыгына төлөнчү 8 млн. сомдон ашык акчаны жеп алган Сузак районунун билим берүү бөлүмүнүн кызматкерлерине кылмыш иши козголду. Бул тууралуу Башкы прокуратура билдирди.
Маалыматка ылайык, аталган райондун билим берүү бөлүмүнүн кызматкерлери 2014-жылы жасалма документтерди жасап, мугалимдердин айлыгына төлөнчү каражатты жеп алышкан.
Анын кесепетинен мамлекетке 8 миллион 15 миң сом зыян келтирилген.
Учурда Сузак районунун билим берүү бөлүмүнүн кызматкерлерине иш абалынан кыянаттык менен пайдаланганы үчүн, ишенип тапшырылган мүлктү коротуу беренелери боюнча кылмыш иши козголду.
