БИШКЕК, 29-июнь — Sputnik. Бишкекте велосипеддерди киреге берүү станциясы ачылганы аталган долбоорду иштетип жаткан компаниянын сайтынан белгилүү болду.
Станциялар өткөн аптада ачылды. Долбоордун максаты коомдук унаа жана автомашинага альтернативалуу транспорт, ошондой эле кыска мөөнөттүү сапар үчүн шаар тургундары менен туристтерге унаа сунуштоо болуп саналат.
Азырынча мындай борборлор Бишкектин төрт жеринде – филармониянын жанында, Чүй проспекти менен Эркиндик бульварынын кесилишинде, Медициналык академиянын жана политехникалык универститеттин жанында иштейт.
Чет элдиктер үчүн "Visa" же "MasterCard" карталары кабыл алынат.
Бир велосипедди киреге алуу үчүн саатына 49 сом, ал эми бир күнгө 79 сом акча төлөнөт.
Бир жумага ижара баасы 249 сом, бир айдыкы 499 сом болот. Мындан сырткары, март айынан октябрга чейин мезгилдүү тариф каралган. Анын баасы 1499 сом.
Велосипед белгиленген мөөнөттөн кеч кайтарылса, 3 миң сом, бузулуп калса 20 миң сом, жоголуп кетсе дагы 20 миң сом айып пул каралган.
