БИШКЕК, 3-июль — Sputnik. Кувейт Бишкектеги Нейрохирургиялык госпиталдын курулушун каржылап, жаңы салына турган Тамга – Каракол электр өткөрүүчүнүн техникалык-экономикалык негиздерин иштеп чыгууга техникалык жардам бөлмөй болду. Маалыматты ТИМдин маалымат кызматы таратты.
Бул туурасында Кыргызстандын Кувейттеги элчиси Жусупбек Шарипов менен болгон жолугушууда Кувейттин Араб экономикалык өнүктүрүү фондунун Азия өлкөлөрү менен кызматташуу Департаментинин директору Юсуф Аль-Бадр билдирди.
Эки тараптуу жолугушууда Кувейт фонду менен кызматташуунун алкагында Кыргызстандын экономикасын өнүктүрүү боюнча долбоорлорду сунуштоо маселеси талкууланды.
