Сариев: Кыргызстан ЕАЭБге кирүүгө толук даяр

БИШКЕК, 3-июль — Sputnik. Кыргызстан ЕАЭБге кирүүгө толук даяр, документтер ратификациядан өтүп бүткөндөн кийин чек аралар токтоосуз ачылат деп билдирди өкмөт башчысы Темир Сариев РИА Новости маалымат сайтына. 

ЕАЭБ — 2015-жылдын 1-январынан тарта евразиялык интеграциянын алкагындагы Россия, Казакстан жана Белоруссия кирген Бажы Биримдигинин негизинде түзүлгөн экономикалык биримдик. Аталган өлкөлөрдөн сырткары, биримдикке Армения да мүчө. Кыргызстандын ЕАЭБге кирүүсү туурасындагы келишим Москва шаарында жогорку Экономикалык кеңештин 2014-жылдын декабрындагы отурумунда кол коюлган. Учурда биримдиктин мүчө өлкөлөрү арасында ага Кыргызстандын кошулуусу боюнча ички ратификациялык процедуралар өтүп жатат. 

"Биз зарыл делген документтердин бардыгына кол койдук. Евразиялык экономикалык комиссия биздин бажы посттордун бардыгын карап, текшерип чыгып, өздөрүнүн оң баасын беришти. Азыр соңку ратификацияны күтүп жатабыз. Акыркы өлкө нотаны алып, ратификациялагандан тарта чек аралар ачылат", — деди Сариев. 

Өкмөт башчысы июлдун ортосунда процедуралар бүтүп каларына ишеним артарын билдирди. 

"Мен 15-июль акыркы күн деп ойлойм. Ага чейин ратификацияланып бүтөт", — деди Сариев.

Москвада 2015-жылдын 8-майында Алмазбек Атамбаев Кыргызстандын Евразиялык экономикалык биримдикке кирүү боюнча келишимге кол койгон.