БИШКЕК, 20-июль — Sputnik. Вице-премьер-министр Дамира Ниязалиева Кытайдагы Кызыл-Суу автономиялуу облусунун өкүлдөрүн кабыл алганын өкмөттүн маалымат кызматы билдирди.
Маалыматка ылайык, жолугушууда Кызыл-Суу автономиялуу облусу менен Кыргызстандын ортосундагы туризмди өнүктүрүү жана инвестиция тартуу маселелери талкууланды.
Ниязалиева өз сөзүндө келген конокторго ыраазычылык билдирип, соода тармагында эле эмес, өнөр жай объектилерин ачуу, завод-фабрикаларды иштетүү багытында кызматташуу сыяктуу орчундуу маселелерге токтолду.
"Кыргызстандын ЕАЭБге кошулушу экономикалык кызматташууну жана өз ара өнүгүүнү кеңейтүүгө шарт түзөт. Эки аймактын туристтик байланышын өнүктүрүү зарыл. Кыргыз улутун эл аралык деңгээлге көтөрүү керек", — деди вице-премьер.
Ниязалиева бул багытта биргелешкен "Жибек жолу" программасын иштеп чыгуу жана Кыргызстандын бардык аймагынан Кызыл-Сууга бирдиктүү туристтик жолдун ачылышы пландаштырылып жатканын кошумчалады.
