Түркиядагы жардырууда жабыркагандардын ичинде кыргызстандыктардын бар-жогу такталууда

БИШКЕК, 20-июль — Sputnik. Суруч шаарында болгон жардыруудан Кыргызстандын жарандарынын бар-жогу такталып жатканын КРдин Анкарадагы консулу Айбек Акаев Sputnik сайтына билдирди.

Дүйшөмбү күнү, 20-июлда Түркиянын Шанлыурфа аймагындагы Суруч шаарында болгон жардыруудан 28 киши өлүп, жүздөн ашык киши жаракат алган.

Консулдун айтымында, Шанлыурфа аймагында кыргызстандыктар бар.

"Учурда Түркиянын ички иштер министрлигинин өкүлү менен сүйлөштүм. Суручта болгон жардырууда кыргызстандыктар тууралуу маалыматтар азырынча жок", — деди ал. 

Жергиликтүү басылмалардын маалымдашынча, жанкечти 18 жаштагы аял болушу мүмкүн. Окуяга күбө болгондор ал эл көп чогулган жерге барып, колго жасалган бомбаны жардырып жиберген делинүүдө.

Учурда окуя болгон жерге тийиштүү органдын кызматкерлери келишти. Түркиянын президенти Режеп Тайып Эрдоган Шанлыурфанын губернаторуна телефон чалып, окуя тууралуу кабардар болду.

Экинчи бомба жарылышы мүмкүн деген маалыматтан улам, жергиликтүү полиция эл көп чогулган жерлерден калктын кетишин суранып жатат. Жарылуудан жабыр тарткандарга медициналык жардам берүү үчүн жакынкы шаарлардан тез жардам кызматтары жана тик учактар тартылды.

Түркиянын Суруч шаары Сирия менен чектешкен аймакта орун алган.