БИШКЕК, 21-июль — Sputnik. Бишкек – Сургут багыты боюнча № 867 каттам менен уча турган жүргүнчүнүн баштыгынан ок табылганын "Манас" аэропортунун маалымат кызматы билдирди.
Аэропорттун авиациялык коопсуздук кызматы жарандын буюмдарын текшерүүдө тыюу салынган заттарды тапкан.
"21-июлда эртең менен саат 8.00дөрдө кыргызстандык жарандын баштыгынан 5 ок табылды. Ал каттамдан алынып, тийиштүү кызматтарга өткөрүп берилди", — деп айтылат билдирүүдө.
Аэропорттун маалымат кызматы билдиргендей, коомдук жана авиациялык коопсуздукту камсыз кылуу үчүн "Манас" аэропортунда такай текшерүү жүрүп турат.
