Кыргыз өкмөтү Куттесай боюнча сотто жеңишке жетишти

БИШКЕК, 21-июль — Sputnik. Москва округунун федералдык соту Кыргыз өкмөтүнүн "Стэнс Энерджи Корп" компаниясына жана "Кутисай Майнинг" ишканасына карата келтирилген жүйөлөрдү мыйзамдуу жана негиздүү деп тапканын өкмөттүн маалымат кызматы билдирет.

Маалыматка ылайык, 2014-жылы РФ Москва шаарынын Соода-өнөр жай палатасынын алдындагы Арбитраждык сотко Кыргыз өкмөтүнө карата "Стэнс Энерджи Корп" компаниясынан жана "Кутисай Майнинг" ишканасынан доо арыз түшкөн. Ага ылайык, өкмөт 119 миллион доллар төлөшү каралган.

Ошол эле жылдын 30-июнунда Арбитраж аталган компаниялардын пайдасына чечим чыгарып берген. 

Кыргыз Республикасы мындай чечимге макул эместигин билдирип, Мосвка арбитраждык сотуна кайрылган. Натыйжада сот Соода-өнөр жай палатасынын алдындагы Арбитраждын чечими жокко чыгарылган. 

"Стэнс Энерджи Корп" компаниясы жана "Кутисай Майнинг" ишканасы Москва округунун федералдык арбитраждык сотуна Мосвка арбитраждык сотунун чечимин жокко чыгаруу боюнча доо арыз менен кайрылган. 

Москва округунун федералдык соту арызды карап чыгып, аны канааттандыруудан баш тартты. Ага ылайык, кыргыз өкмөтүнүн аталган компанияларга карата келтирилген жүйөлөрү мыйзамдуу жана негиздүү деп табылды.

Буга чейин Кыргызстан кореялык компанияга карата эки соттук иште утуп чыккан. Талап кылынган сумманын жалпы көлөмү 148 миллион долларды түзгөн.

Мындан тышкары, "Стэнс Энерджи Корп" компаниясы жана "Кутисай Майнинг" ишканасы тарабынан берилген доо арыздын негизинде Кыргызстандын "Центерра Голд Инк" жана түркиялык "Систем Мюхендислик Санайи ве Тиджарет" компанияларындагы акциялары камактан чыгарылган.