БИШКЕК, 24-июль — Sputnik. Билим берүү жана илим министрлиги системалык коррупция көрүнүштөрүн жоюу боюнча бир катар ийгиликтерге жетишкенин Коргоо кеңешинин катчылыгы билдирди.
Ага ылайык, иш-аракеттердин натыйжасында, жогорку окуу жайларына лицензия берүү мөөнөтү беш айдан 20 күнгө кыскарып, бала бакчаларга лицензия берүү бир топ жеңилдетилген. Мындан тышкары, "1 ЖОЖ – 1 юридикалык тарап" принцибин ишке киргизүү менен окуу жайлардын алдындагы юридикалык жактар жабылган. Ошондой эле штрих-коддорду таануу системасы иштей баштаган, мындан улам штрих-код тапшырган абитуриенттер өз рейтингин 10-15-мүнөттөн кийин билүүсүнө мүмкүнчүлүк түзүлгөн.
Ал эми 1-сентябрдан тарта бала бакчалар менен мектептерди каржылоо суммасы, балдардын саны, казыналык эсеби жана башка милдеттүү маалыматтар чагылдырылган интерактивдүү картасы түзүлөрү белгилүү болду.
