БИШКЕК, 24-июль — Sputnik. "Ислам мамлекети" террористтик уюмунун отуз беш согушкери Түркиянын Аскердик аба күчтөрүнүн Сирияда жүргүзгөн операциясы учурунда өлтүрүлдү.
Түркия өкмөтүнүн расмий түрдө F-16 үлгүсүндөгү үч учак саат 3.40 — 3.53 аралыгында лазерлүү мээлегичи бар бомбаларды колдонуу менен Сирияда "Ислам мамлекетинин" согушчандары жайгашкан үч жерди жок кылышты. Командалык эки борбор жана согушкелер чогулуучу жай кыйратылган. Бул Түркиянын аба мейкиндигинин чегинде туруп абадан урган биринчи соккусу.
"Ислам мамлекети" террористтик уюму бүгүнкү күндө дүйнөнүн эң башкы коркунучтарынын бири болуп калууда. Үч жылда террорчулар Ирак менен Сириянын көпчүлүк бөлүктөрүн басып алган. Мындан тышкары, алар өз таасирин Түндүк Африка өлкөлөрүндө, атап айтканда, Ливияда жайылтуу аракетин көрүүдө. "ИМ" үстөмдүк кылган аймак 90 миң чарчы чакырымга жетет жана аларда террорчулар "Халифат" жарыялашып, өз мыйзамдарын орнотуп, өз бийлик органдарын дайындашкан. Экстремисттик уюмдун мүчөлөрүнүн саны ар кандай маалыматтар боюнча 50 миңден 200 миңге чейин чукулдап барат.
"ИМге" каршы бирдиктүү күрөш фронту жок: топко каршы Сирия менен Ирактын мамлекеттик күчтөрү, АКШ башчылык кылган Эл аралык коалиция (азырынча абадан гана сокку уруу менен), күрддөр жана Ливан менен Ирактын шииттеринен турган ыктыярдуулар тобу күрөшүп жатат Согуш аракеттеринин натыйжасында миңдеген карапайым тургундар каза таап, бир нече миллиону качкынга айланган.
