БИШКЕК, 3-авг — Sputnik. Кыргызстанда доллардын таңсыктыгы байкалып жатканын Sputnik агенттигине "Альянс" акча алмаштыруу бюролорунун ассоциация төрагасы Бактыбек Чойбеков билдирди.
Республикада турак жай, автоунаа сатуу, сатып алуу сыяктуу ички келишимдер доллар менен жүргүзүлөт. Ал эми тышкы соода операцияларынын бардыгы доллар менен ишке ашат.
"Кыргызстанга келген туристтердин көбү америкалык доллар менен келгенине карабастан, бүгүнкү күндө бул валютанын тартыштыгы байкалууда", — дейт Чойбеков.
Анын айтымында, Улуттук банк ички рынокто доллардын тартыштык маселесин кандай жол менен чечери белгисиз. Мында салттуу түрдө экономикалык өнөктөш болуп келген мамелкеттердеги кыйынчылыктардан улам сомдун курсу төмөндөп жатат.
"Мисалы, бир жума мурун бир доллар 60,8 сом турса, азыр 61,6 – 61,7 сомго бааланууда. Доллар күнүгө 5-10 тыйынга кымбаттап жатат", — деди ассоциациянын төрагасы.
Акыркы эки жыл ичинде Улуттук банк валюталык интервенциянын жардамы менен доллардын көтөрүлүшүн көзөмөлдөп турду. Быйыл өлкөнүн башкы банкы валюта рыногуна 16 ирет чыккан.
