БИШКЕК, 10-авг. — Sputnik. Баткен районуна караштуу Көчө-Карын аймагындагы кыргыз-тажик чек ара аймагында кайрадан чыр чыгып, кыргызстандык чек арачы жарадар болду. Бул туурасында Мамлекеттик чек ара кызматынын маалымат кызматынан билдиришти.
8-августта Көк-Таш айыл аймагына жакын Көчө-Карын деп аталган жерде 15 чакты тажик жарандары Кыргызстандын чек арасын бузуп кирип келе жаткан жеринен токтотулган. Алардын бири кармалып, калганы Тажикстандын аймагына кирип кетишкен.
"Кармалган адамды чек ара заставасына алып бара жатканда Тажикстан тараптан болжол менен кичи калибрлүү куралдан ок атылып, кыргыз чек арачысынын бутуна тийген", — деп билдирди аталган ведомствонун маалымат кызматы.
Аталган ведомствонун маалыматында, кыргыз-тажик чек арасында учурда абал тынч.
Жакында эле Баткен районунда, ушул аймакта Көк-Таш айылындагы кыргыз-тажик чек арасында суу талашынан улам чыр чыккан.
