БИШКЕК, 12-авг. — Sputnik. Быйылкы жылы өлкө аймагынан чогултулган битир-садаганын жалпы суммасы 31,1 миллион сомду түздү деп Кыргызстандын мусулмандарынын диний башкармалыгы билдирди.
Ал эми Бишкек шаарынын борбордук мечитине 3 миллион 87 миң сомдук битир-садага ташташкан.
Учурда битир-садага таратуу иштери улантылып жатканын Кыргызстандын мусулмандар диний башкармалыгынан билдиришти.
"Каражат ар кандай түрдө бөлүнүп жатат, бир катар тараптарга акча түрүндө берилсе, айрымдары азык-түлүк түрүндө таратылууда. Маселен, Баткен, Жалал-Абад облустарында тамак-аш түрүндө берүүнү суранышкандыктан, казылыктын кызматкерлери алар айткандай кылып жеткирип беришкен. Учурда чогулган каражатты муктаж болгондорго таратуу улантылып жатат", — деп билдирди муфтияттын маалымат кызматынын өкүлү Максат Мамбеталиев.
Кыргызстан мусулмандар диний башкармалыгынын токтомуна ылайык, чогултулган битир-садаганын 50 пайызы мечиттерде калат. 15 пайызы райондук баш имам хатиптерде, 15 пайызы облустук казыятта жана 20 пайызы муфтиятка бөлүнөт.
Республиканын аймактарында чогулган битир-садаганын суммасы төмөндөгүдөй:
- Бишкек казыяты — 3 миллион 93 миң;
- Бишкек борбордук мечити — 3 миллион 87 миң;
- Ош шаары — 1 миллион 76 миң;
- Ош облусу — 5 миллион 960 миң;
- Жалал-Абад облусу — 4 миллион 408 миң;
- Чүй облусу — 3 миллион 179 миң;
- Баткен облусу — 2 миллион 531 миң;
- Нарын облусу — 2 миллион 599 миң;
- Ысык-Көл облусу — 3 миллион 24 миң;
- Талас облусу — 2 миллион 157 миң.
