Аким: Чычкан капчыгайы кууш болгондуктан, тик учактар өрткө жакындай албай жатат

БИШКЕК, 21-авг. — Sputnik. Казакстандан келген тик учак бүгүн эртең менен таңкы саат алтыдан бери беш рейс жасады, бирок күтүлгөндөй жыйынтык бербей, өрт өчпөй жатат деди Токтогул районун акими Майор Сатымкулов Sputnik маалымат агенттигине.

Анын айтымында, тик учактарды бардыгы чыдамсыздык менен күткөн, бирок өрттү өчүрүү алар пландагандай болбой жатат.

"Биз күткөндөй чоң жыйынтык болбой жатат. Азыр учкучтар менен иштеп, жергиликтүү шартты түшүндүрүп жатабыз. Биздин тоолор бийик жана тик, капчыгай кууш болуп жатат. Ал эми келген тик учактар көлөмдүү болгондуктан, бурула турган жердин радиусу эле бир канча чакырым болушу керек экен. Ошон үчүн отко түз кирип, дал үстүнө суу төгө албай жатат", — деди Сатымкулов. 

Анын айтымында, Чычкандагы өрттү өчүрүүгө бүгүн бардыгы болуп 680 адам чыкты, алар Өрт кызматы, токой чарбаларынын кызматкерлери жана райондун эли. 

Чычкан капчыгайындагы өрт 2015-жылдын 13-августунда кечке жуук Бишкек-Ош унаа жолунун 251-253-чакырымдарында башталган. ӨКМ менен жергиликтүү бийликтин маалыматында ары-бери каттагандарга кооптуулук жараткан жок. Бирок учурда 100 гектардан ашык аймак өрткө кабылды. 

Өрттү сегиз күндөн бери өчүрө албай жатышат. Буга чейин тилсиз жоо менен күрөшүү негизинен, кол менен жүргүзүлүп келген. 

ӨКМ министри Кубатбек Боронов Казакстандан тик учактар келери менен капчыгайдагы өрт бүгүн, 20-августта өчөт деп маалымат берген.