БИШКЕК, 28-авг. — Sputnik. Египеттин соту "Ислам мамлекетинин" он эки согушкерин Египеттин армиясынын аскерлерине, полицияга кол салууга ниеттенгендиги үчүн өлүм жазасына тартты. Бул туурасында Франс Пресс сот өкүлдөрүнө таянып маалымат берди.
Агенттиктин айтымында, өкүм чыгарылгандардын ичинен алты киши темир тордун артында отурат, ал эми калгандары дагы деле эркиндикте жүрөт. Жоопко тартылгандар Египеттин армиясынын аскерлерине, полицияга кол салууга даярданышкандыгын моюндарына алышты.
Ушул эле провинцияда болгон башка соттук отурумдарда эки тууган "Ислам мамлекетинин" идеологиясын Facebook баракчасында тараткандыгы үчүн үч жылга эркинен ажыратылган.
"Ислам мамлекети" террористтик тобу бүгүнкү күндө дүйнөгө коркунуч жараткан негизги күчтөрдүн бири. Үч жыл ичинде террорчулар Ирак менен Сириянын көпчүлүк жерлерин басып алган. Андан тышкары, алар Түндүк Африка өлкөлөрүнө, тагыраак айтканда, Ливияга өз таасирин жайылтуу аракетин көрүп жатат. Ар кайсы маалыматтарга ылайык, жалпы көлөмү 90 миң чарчы чакырымга жеткен көзөмөлүндөгү жерлерде согушкерлер халифат жарыялап, өз мыйзамдарын жана бийлигин орноткон.
