БИШКЕК, 4-сен. — Sputnik. Бүгүнкү күндө Билим берүү, Коргоо, Маданият министрликтеринин, ошондой эле ИИМ, МЖАК мекемелери көмүр даярдай электигин күз-кыш мезгилине даярдык боюнча өткөн селектордук жыйында энергетика жана өнөр жай министри Кубанычбек Турдубаев билдирди.
Республика боюнча жалпы жонунан 2 миллион 718 миң тонна көмүр даярдалышы керек. Мында Бишкек ТЭЦ 1 миллион 444 тонна, бюджеттик ишканалар 237,1 тонна жана калк 1 миллион 37 миң тонна көмүр даярдашы шарт.
Көмүр сатып алуу боюнча тендерде ортомчулукка жол бербөө керектигин өкмөт башчы Темир Сариев белгиледи.
"Көмүр сатып алуу ортомчусуз түз жүрүшү керек. Ошто ири көмүр компаниясы 600 миң тонна көмүр өндүргөнү менен, аны ортомчу аркылуу сатат", — деди премьер-министр.
Өкмөт тендерге өз техникасына жана өзүнүн көмүрүнө ээ компаниялардын катышуусу мүмкүн экенин эскертти.
Бирок өкмөт аппаратынын жетекчиси аталган токтомдун ишке кириши учурда айрым себептер менен кийинки мезгилге жылдырылганын белгиледи.
