БИШКЕК, 7-сен. — Sputnik. "Ош-Тазалык" ишканасы таштандыларды WhatsApp кызматы аркылуу тазалоого киришкенин аталган мекеме билдирди.
Маалыматка ылайык, эми көчөлөрдүн боюнда, көп кабаттуу үйлөрдүн айланасында жана арыктарда тазаланбай турган таштандыларды, толуп калган таштанды төгүүчү челектерди, акыр-чикирлерди, жолбун иттер көп жүргөн жерлерди байкаган шаар тургундары "Ош-Тазалыкка" WhatsApp аркылуу сүрөткө тартып же телефон чалып кабарласа болот. Маалымат келери менен ишкана кызматкерлери убагында чара көрүп, ошол аймакты тазалоо иштерин жүргүзөт.
WhatsApp кызматы "Ош-Тазалык" ишканасынын жетекчиси Талант Капаровдун 0772-00-33-33, анын орун басары Жылдыз Көчкөнов 0772-01-10-03 жана башкы инженердин 0779-50-76-53 телефон номуруна туташтырылган.
Буга байланыштуу ишкана кызматкерлери чакырык баракчаларын көп кабаттуу үйлөрдүн кире беришине, үйлөрдүн короолоруна жана жарнама илүүчү аймактарга илип чыгышты.
Буга чейин таштанды тазалоодо WhatsApp кызматын колдонуу ниетин Бишкек шаарынын райондору билдиришкен.
