БИШКЕК, 9-сен. — Sputnik. Бишкекте жүргүнчү ташыган такси айдоочуларына кол салган топ кармалганын Бишкек ШИИБ билдирди.
Маалыматка ылайык, Токтогул менен Кулиев көчөлөрүнүн кесилишинде Бишкек – Ош каттамы боюнча жүргүнчү ташыган айдоочуга түнкү саат 10до төрт жаран келип 14 адам чогуусу менен Ошко бара турганын айтышкан. Таксист өзүнүн айдоочу таанышын чакырат.
"Хонда-Степвагон" жана "Хонда Одиссей" унааларына отурган жигиттер Ден Сяопин менен Алыкулов көчөлөрүнүн кесилишине жеткенде арткы орунда отурганы айдоочуну муунтуп, экинчиси бычак такаган. Андан кийин айдоочуну ур-токмокко алып, таңган боюнча багажникке салып салышкан. Кийинки унаанын айдоочусу да ушундай окуяга туш болгон. Май куйганы токтогондо "Хонда-Степвагон" унаасынын айдоочусу качып чыгып, милицияга кабар берүүгө жетишкен", — деп айтылат билдирүүдө.
Каракчыларды кармоо үчүн Бишкек шаары менен Чүй облусунда "Перехват" планы жарыяланган. Анын натыйжасында "Манас" аэропортуна жол алган "Хонда-Степвагон" унаасы токтотулуп, текшерүү учурунда ичиндеги жарандар буга чейинки бир нече ирет соттолгондугу аныкталган.
Учурда аталган факт боюнча кылмыш иши козголуп, кармалган жарандар убактылуу кармоочу жайга киргизилди. Тергөө иштери жүрүүдө.
