БИШКЕК, 14-сен. — Sputnik. Дүйшөмбүдөн тарта Кыргызстандын саясий партияларынын эфирдик таймашы башталат.
Буга чейин Борбордук шайлоо комиссиясында КТРК жана ЭлТР каналдарында эфирдик убакытты бөлүштүрүү боюнча чүчү кулак өткөн. Бөлүнгөн убакыттын алкагында саясий партиялар акысыз эфирге чыга алышат.
БШКнын маалыматына ылайык, партиялардын катышуусу менен өтө турган тегерек столдор КТРК каналында 30-сентябрдан 1-октябрга чейин, ал эми ЭлТРде 14-22-сентябрь күндөрү өтөт.
Партиялар жеке сөз менен ЭлТР каналынан 14-сентябрдан 1-октябрга чейин, ал эми КТРКдан 16-24-сентябрь күндөрү чыга алышат.
Шайлоого аттанган саясий уюмдардын дебатын КТРКдан 25-29-сентябрда, ал эми ЭлТР каналынан 26-28-сентябрь күндөрү көрүүгө болот.
Үстүбүздөгү жылдын 4-октябрына белгиленген парламенттик шайлоого карата үгүт өнөктүгү 4-сентябрда башталган.
Эфир убактысын саясий партияларга бөлүштүрүү
