ЛЕЙЛЕК, 16-сен. – Sputnik. Өлкө башчысы Алмазбек Атамбаев Ош — Баткен — Исфана жолунун (220-363-чакырымдары) курулушу менен жеринде таанышты.
Транспорт жана байланыш министрлигинин инвестициялык долбоорлорду ишке ашыруу боюнча тобунун жетекчиси Кубанычбек Мамаевдин айтымында, аталган жол Кытайдын Экспорт-импорт банкы тарабынан бөлүнгөн жеңилдетилген насыяга салынууда.
"Учурда 220-участоктон 232-ге чейинкиси бүттү. Ошондой эле 28-чакырымдан 75-чакырымга чейинки аралыкты салуу боюнча иштер тууралуу документке октябрь айында кол коюу каралып жатат. Андан сарткары 75-чакырымдан 108-чакырымга чейин жолду салуу боюнча документти ратификацияга жибергенден кийин тендерлер башталат", — деди Мамаев.
Аталган жолдун курулушу 2013-жылы башталган, ал 2016-жылы аяктайт. Учурда биринчи участок Чоң-Кара — Баткен (12,9 чакырымы) бүттү. Андан сырткары, Төрт-Күл — Ак-Атыр (23,5 чакырым) жана Ак-Атыр — Исфана (86,5 чакырым) участоктору бар. Ош — Баткен — Исфана жолун курууга жалпысынан 91,4 миллион доллар каралган.
