БИШКЕК, 22-сен. — Sputnik. "ИИМдеги Бауржан" тууралуу чуулгандуу видеонун каарманы Ринат Букарбаев тергөө абагына алынганын Бишкек ШИИБ билдирди.
Бир жума мурун социалдык тармактарда мас абалындагы айдоочунун Жол кайгуул милициясынын коопсуздук кызматынын инспекторлорун сөгүп-кагып, кармагандары үчүн "ИИМдеги Бауржан" менен коркутканы тартылган видео пайда болгон. Айдоочу менен жүргүнчү интернетте "алтын муун" деп аталып калды.
Ал арада шейшемби күнү кармоо учурунда Букарбаевдин каршылык көрсөтүү факты Свердлов РИИБде катталып, мындан улам бейбаштык беренесинин негизинде кылмыш иши козголгону белгилүү болду.
21-сентябрда Свердлов райондук соту Букарбаевдин баш коргоо чарасы катары бир айга тергөө абагына алуу чечимин кабыл алган.
Учурда тергөө жүрүп жатат.
