БИШКЕК, 25-сен. — Sputnik. "Ислам мамлекети" террористтик уюмуна каршы күрөшүү боюнча Россиянын сунуштары БУУнун Коопсуздук кеңеши тарабынан кылдат каралышы керек деп билдирди бейшембиде Sputnik менен болгон маегинде Пентагондун мурдагы башчысы Чак Хейгел.
"БУУнун Коопсуздук кеңешинин мүчөсү берген ар бир сунуш олуттуу кабыл алынышы керек деп эсептейм", — деди АКШнын Коргоо министрлигин февралга чейин жетектеп келген Хейгел.
Россия ТИМинин жаңы сыноолор жана коркунучтар боюнча департаментинин директору Илья Рогачев РИА Новости агенттигине Москва "Ислам мамлекетине" каршы күрөшүү үчүн кенен коалиция түзүү боюнча сунуштарынын айрым аспектилерин чет элдик өнөктөштөр менен талкуулап жатканын билдирген эле. Атап айтканда, Россия БУУнун Коопсуздук кеңешинин жана окуя жүрүп жаткан өлкөлөрдүн уруксаты менен күч колдонушу керек. Рогачев билдиргендей, Россия "Ислам мамлекетине" жана Жакынкы Чыгыш менен Түндүк Африканын башка террориститк уюмдарына каршы күрөшүү боюнча легитимдүү жана абройлуу эл аралык коалиция түзүү мүмкүнчүлүгүн шериктештеринин кенен катмары менен талкуулоо ниетинде".
"Ислам мамлекети" террористтик тобу бүгүнкү күндө дүйнөнүн башкы коркунучтарынын бири болуп эсептелет. Үч жыл ичинде террористтер Ирак менен Сириянын көпчүлүк жерлерин басып алышкан. Ошондой эле алар өз таасирин Түндүк Африкада, тагыраак айтканда, Ливияда жайылтуу аракетин көрүп жатат. Ар кайсы маалыматтарга ылайык, алар өзүнө каратып алган жерлердин жалпы көлөмү 90 миң чарчы чакырымга жетет.
