БИШКЕК, 25-сен. — Sputnik. Казакстан Жакынкы Чыгыштан качкындарды кабыл алууга даяр деп билидрет Tengrinews.kz жаңылыктар сайты.
Агенттик билдиргендей, ушундай пикири менен Казакстандын саламаттык сактоо жана социалдык өнүктүрүү боюнча вице-министр Биржан Нурымбетов качкындарды коргоо жана эл аралык миграция боюнча Алматы процессинде бийик даражалуу адамдардын расмий эмес сүйлөшүүсүндө бөлүшкөн.
Аткаминердин айтымында, 2011-жылы "Качкындар жөнүндө" мыйзам кабыл алынып, анда качкындардын же башпаанек издегендердин статусу жөнүндө маселелер теске салынган.
"Бизде БУУнун качкындардын иштери боюнча туруктуу өкүлчүлүгү иштейт. Массалык агымдар маселеси да мыйзамда каралган — өзгөчө кырдаалдарга байланышкан мыйзамдарга ылайык чаралар көрүлөт", — деди Нурымбетов.
Вице-министр, эгер талап кылынса, качкындарды жайгаштырып, аларды баш калкалоо жайлары менен камсыз кылуу боюнча чаралар көрүлөт.
"Казакстанга качкындар келет деп ойлобойм", — деп сөзүн жыйынтыктаган вице-министр. Анын айтымында, качкындар маселеси менен Казакстандын ички иштер министирлиги алектенет.
Агенттиктин маалыматына ылайык, Нурымбетовдун пикирине макулдугун БУУнун Жогорку комиссарынын башкармалыгынын Борбордук Азияда качкындар маселеси боюнча аймактык өкүлү Бернард Дойл билдирген.
"Согуштан жабыркагандардын Жакынкы Чыгышта жана Европадагы оор абалы олуттуу маселе. Борбордук Азияга көп сандагы качкындар келет деген коркунуч жана мүмкүнчүлүк бар деп ойлобойм. Ошентсе да, Борбордук Азия өлкөлөрү бул жагдайда олуттуу жардам көрсөтүп, жана өзүнө качкындарды кабыл алып жаткан өлкөлөргө үлгү боло алышат", — деди ал.
Министрликтин маалыматына ылайык, 2012-жылдан бери Сириядан Кыргызстанга 121 адам келип, качкындын расмий макамы 60 кишиге берилген.
