БИШКЕК, 2-окт. — Sputnik. Кыргыз элинин улуу акыны Алыкул Осмоновдун 100 жылдыгына карата чыгармалар жыйнагы түрк тилинде жарык көргөнүн Тышкы иштери министрлиги билдирди.
Маалыматка ылайык, "Мен кыргыздын акыны" жыйнагынын бет ачары 2015-жылдын 12-октябрында Түркиянын Амасья шаарындагы университетинде жана 13-октябрь күнү ТҮРКСОЙ уюмунун басылмасында өтөт.
"Кыргызстандын маданий мурасын жайылтуу жана залкар акындын чыгармачылыгы менен түрк элин тааныштыруу максатында чыгарылган китептин бет ачарына Түркиянын маданият жана туризм министри Ялчын Топчу, Кыргызстандын Түркиядагы элчиси Ибрагим Жунусов катышат", — деп айтылат билдирүүдө.
Иш-чаранын алкагында илимий талкуу жүрүп, анда евразиялык жазуучулар союзунун төрагасы Якуб Омероглу, кыргыз жана түрк окутуучулары, ошондой эле түрк акындарынын катышуусу күтүлүүдө.
