БИШКЕК, 6-окт. — Sputnik. Кыргызстан — Тажикстан беттешүүсүнө оюн күнү билет сатылбай турганын Sputnik агенттигине Футбол федерациясынын маркетинг жана пиар департаментинин жетекчиси Анна Осмоналиева билдирди.
Осмоналиеванын айтымында, оюн күнү билеттерди сатуудан алып салуу чечими Кыргызстан менен Австралиянын беттешүүсүнөн кийин кабыл алынган. Анда күйөрмандарды стадион ичине киргизүүгө убакыт келгенде айрымдардын билет сатып алуу үчүн кезекте турганы байкалган. Учурда сатылган билеттер тууралуу маалымат жок.
"Федерациянын өнөктөштөрү жана кызматкерлери, футболдун ардагерлери жана балдар үйлөрү үчүн чакыруу таратылды", — деди Осмоналиева.
Федерация бир колго бештен ашпаган билет сатылып жатканын белгилейт. Эгер билеттер жогорулатылган баа менен сатылып жатканын байкагандар болсо, федерацияга кайрылуу керектиги айтылууда.
