БИШКЕК, 11-окт. — Sputnik. Кыргызстандын дзюдо боюнча жаштар курама командасы Бириккен Араб Эмирлигинин борбору Абу-Дабиде өтө турган дүйнө чемпионатына катышарын федерациянын менеджери Акжибек Алтынбекова билдирди.
Анын айтымында, мелдеш 21-28-октябрь күндөрү өтөт.
"Кыргызстандан бул чемпионатка төрт кыз, беш бала жана эки машыктыруучу барат деп күтүлүп жатат", — деди менеджер.
Бул мелдештен кийин 28-октябрдан 2-ноябрга чейин "Grand Slam — Чоң Шлем" турнири өтөт. 2016-жылы өтө турган Олимпиадага тандоо үчүн рейтингдик мелдеш болуп эсептелген бул турнирге дүйнөнүн күчтүү дзюдочулары катышат.
Алардын арасында Юрий Краковецкий, Чыңгыз Мамедов, Болот Токтогонов баш болгон кыргызстандык жети спортчу бар.
