БИШКЕК, 16-окт. — Sputnik. Жок кылынган кылмышкер Данияр Кадыралиев кармоо учурунда активдүү каршылык көрсөткөнүн Бишкек ШИИБ билдирди.
Бүгүн түнү милицияга түрмөдөн качкан кылмышкерлер "Дордой" базарынын жанындагы "Энесай" жаңы конушунда жүргөнү тууралуу маалымат түшкөн.
Иликтөө иштеринин аркасында Данияр Кадыралиев атып өлтүрүлгөн. Учурда жаңы конуш курчоого алынып, анын айланасынан түрмөдөн качып чыккан кылмышкерлерди издөө жүрүп жатат.
Дүйшөмбүгө караган түнү №50 түрмөдө отурган тогуз адам качып кеткен. Аларды токтотууга аракет кылган ЖАМК кызматкерлеринин үчөө өлүп, бирөө оор жарадар болгон. Ооруканага жеткирилген ал кызматкер бүгүн түнү эсине келбестен каза болду.
Атайын операция учурунда алардын бешөө кармалып, төртөө из жашырганга үлгүргөн. Иликтөө иштеринин аркасында бүгүн анын бири атып өлтүрүлдү.
УКМК кылмышкерлердин жайгашкан жери тууралуу так маалымат берген жаранга 300 миң сом өлчөмүндө каражат бере турганын билдирген.
