БИШКЕК, 19-окт. — Sputnik. Жогорку Кеңештин депутаты Хажимурат Коркмазов президенттик аппараттын экс-жетекчиси Данияр Нарымбаев ага кысым жасап жатканын сотто билдирди.
Июль айынын ортосунда УКМКнын Коррупцияга каршы кызматы Коркмазовду 100 миң доллар пара алып жаткан жеринен кармаган. Башкы прокуратура анын экс-депутат Нариман Түлеевдин жакындарынан ишти Жогорку сотто оң жагына оодаруу үчүн 200 миң доллар пара талап кылганын билдирген. Аталган иште президент аппаратынын жетекчиси Данияр Нарымбаевдин аты аталган. Көп узабай ал дагы пара талап кылууга шектелип камакка алынган. Кармалган жарандар УКМКнын тергөө абагында отурат.
"Данияр Ильич менин май айында берген көрсөтмөлөрүмдү өзгөртүүнү сурап жатат. Мен өз жолуман тайбай, чындыкты гана айта турганымды билдирдим. Эми мага кысым жасалып жатат. Керек болсо, аягына чейин дарылана албай да жатам. Өз укугуман пайдаланып, Нарымбаевдин тарабы менен кызматташуудан баш тартып, анын жактоочуларынын суроосуна жооп бербейм", — деди Коркмазов.
Мындан кийин соттун жүрүшүндө Нарымбаев менен Коркмазовдун адвокаттары айтыша кетишти.
