БИШКЕК, 20-окт. — Sputnik. Тестиер кызды сүзүп, унаасын таштап качып кеткен айдоочу кармалганын Бишкек ШИИБ Жол кайгуул кызматынын издөө бөлүмүнүн башчысы Ажыбек Майназаров билдирди.
Кырсык саат 17.10дө Жукеев-Пудовкин көчөсүндө болгон. Алган жараттарынан улам кыз ошол жерден каза болгон.
"Honda Civic унаасы менен келе жаткан айдоочу кызды сүзүп, дагы 30 метрге чейин капотунда сүйрөп барган. Ылдамдыгы саатына 80 километрге жеткенин айтып жатат. Рулду башкара албай, ал жол белгисин сүзүп токтогон. Ошондон кийин гана кыз капоттон учуп түшкөн", — деди ал.
Кырсык тууралуу маалымат түшкөндөн кийин милиция кызматкерлери дароо издөө иштерине киришкен.
"Мамлекеттик номер боюнча айдоочунун атасына чыктык. Ал аркылуу кыздын өлүмүнө себепкер болгон айдоочу кармалды", — деди Майназаров.
Унаанын ичинде үч адам болгон. Учурда үчөөнү тең тергөөчү наркология борборуна текшерүүдөн өтүүгө жиберди.
