БИШКЕК, 21-окт. — Sputnik. Россиянын Черногорск шаарында жашаган кыргызстандык жаран өзүнүн жашаган жерине 40тан ашуун чет элдиктерди каттап келгенин ИИМдин Хакасия боюнча башкармалыгынын маалымат кызматы билдирди.
Мекеме териштирүү учурунда аталган жаран турак үйдүн 1/8 бөлүгүнө гана ээ экендиги аныкталды. Калган жети бөлүгү анын балдарына караштуу.
"Катталгандар негизинен Кыргызстандан келген жарандар. Черногорск шаарында калууну каалагандарды үй ээси мыйзамсыз түрдө үйүнө каттап келген", — деп айтылат билдирүүдө.
Аталган жарандар ал үйдө дээрлик жашаган эмес. Ар бир катталган адамдан "меймандос" аял 500дөн 4 миң рублге чейин акы алып турган.
Бул боюнча козголгон кылмыш иши сотко өтүп, кыргызстандык жаранга РФтин Кылмыш жаза кодекси боюнча айып тагылды.
