БИШКЕК, 21-окт. — Sputnik. ЖАМК төрагасы Алик Мамыркуловдун буйругу менен 50-түрмөнүн жетекчилиги жумуштан кетип, жеке курамы алмаштырылганын аталган кызмат билдирди.
Маалыматка ылайык, кызматкерлер ишиндеги олуттуу кемчиликтер тогуз кылмышкердин түрмөдөн качып чыгышына жол бергенинен улам жумуштан бошотулду.
Өткөн аптанын башында Төмөнкү Нооруз айылында жайгашкан 50-түрмөдөн тогуз кылмышкер качып чыккан. Аларды токтотууга аракет кылган ЖАМКтын үч кызматкери өлтүрүлүп, дагы бири оор жарадар болгон. Ал беш күндөн кийин ооруканада эсине келбей жатып көз жумган.
Качкан кылмышкерлердин бешөө ошол эле түнү кармалып, төртөө из суутканга үлгүргөн. Атайы операциянын натыйжасында алардын экөө жок кылынды. Ал эми түрмөгө кайтарылган кылмышкерлердин үчөө ооруканадан каза болушту.
Эркиндикте жүргөн эки кылмышкерди издөө иштери улантылууда.
